My wó nas
Centrum za dialog a změnu ewangelskeje cerkwje Barliń-Bramborska-šlazyńska Górna Łužyca wobstoj z lěta 2018. Wón ma swójo sedło w Chóśebuzu.
Až do lěta 2023 jo Centrum ako cerkwina institucija pódpěrował towarišnostny dialog we Łužycy. Jomu jo se w tom casu raźił, wobradowaś gmejny a cerkwine wokrejse w pšašanjach strukturneje změny, sobu statkowaś w Brunicowem wuběrku kraja Bramborska, organizěrowaś a póbitowaś dialogowe dny a tak pśecej zasej pózbuźowaś rozgrono mjazy cerkwju, góspodaŕstwom, wědomnosću a politiku. Mimo togo jo był Centrum rozsudnje wobźělony pśi pśigótowanju a pśewjeźenju Łužyskego cerkwinego dnja a jo wušej togo wuźaržował ten zdźěla nowo wutwórjony kontakt k źěłaŕnistwam a drugim ciwilnotowarišnostnym akteram.
Wót 1. januara 2024 źěła Centrum za dialog a změnu z dalej wuwitymi nadawkami. Wón dej se něnto zaběraś z pšašanjami cerkwje a towarišnosći we wobyma wejsański pregowanyma amtskima wobceŕkoma Pódstupim a Zgórjelc.
Ewangelska cerkwja stoj w swójej wjelerakosći za wótwórjonu a demokratisku towarišnosć, ako jo cłowjekoju pśichylona. Wóna wiźi w kuždem jadnotliwem cłowjeku jaden wót Boga z jadnoraznymi darami wobdarjony indiwiduum a pózbuźujo luźi, z toś tymi darami pśinosowaś k towarišnosći a k dobremu žywjenju wšyknych.
Centrum pódpěra cerkwine wokrejse a wósady pśi pšašanjach strukturneje změny a transformaciskich procesow. Wón se zasajźijo za tych, ako se mało słyše w strukturnej změnje a dajo impulse za te wjelerake temy wejsnych rumow. Wón póbitujo pomoc pśi projektach z fokusom a orientaciju na pógromadnosć pśez multiprofesionelny team. Pśi tom comy se ako cerkwja z našymi městnosćami a rumnosćami hyšći wěcej wótwóriś za dialogi mjazy ciwilneju towarišnosću, góspodaŕstwom, politiku a wědomnosću a słuchaś na wósobinske stawizny luźi, kótarež wugótuju transformaciju.
Centrum co w toś tych procesach pśeměnjenja teke slěźiś za statkownosću a wuznamom kśesćijańskeje wěry, teologije a spiritualnosći a pśiś wó tom do rozgrona ze zajmcami.
faraŕka Dorothee Land
Wjednica Centruma za dialog a změnu
Pśibrjozna droga 1
03046 Chóśebuz
Übersetzung: Dr. Madlena Norberg
) + J
) + K
) + G
) + O
) + V
) + Y